महेश भुसाल
रेडियो देउराली अर्घाखाँची
चैत १० – २०७१
ताप्लेजुङ सदरमुकाममा सोमबार राती भीषण आगलागी भएको छ । बेलुकी
साढे ७ बजेदेखि शुरु भएको आगलागीले ताप्लेजुङ सदरमुकाम फुङलिङ बजारको
तोक्मेडाँडा क्षेत्रका झण्डै चार दर्जन घर ध्वस्त
भएका छन् । अहिलेसम्म ४५ वटा घर जलेर नष्ट भएको पुष्टी भएको छ । घर जलेपछि
दर्जर्नौ परिवारको विचल्ली भएको छ । राती साढे १० बजेतिर मात्र आगो
नियन्त्रणमा आएको थियो । आगलागीबाट कति क्षति भयो भन्ने विवरण आएको छैन ।
क्षतिको विवरण संकलनको काम भैरहेको छ ।
सदरमुकाम फुङलिङको पूर्बेली होटलबाट
आगलागी सुरु भएको भनिएपनि यकिन हुन सकेको छैन । आगलागीले तोक्मे क्षेत्रमा
रहेका तीनवटा सरकारी कार्यालय लगायत आधा दर्जन गैर सरकारी र सयौं पसल तथा
सामाजिक संघसंस्थाका कार्यालय समेत जलेका छन् ।
आगो नियन्त्रण गर्न नरेन्द्र गुरुङको घर
भत्काई अघि बढ्न नदिने प्रयास गर्दै गर्दा आगो तोक्मेडाँडा क्षेत्रतर्फ
बढेको थियो । आगोले तोक्मेडाँडाको बजार लाग्ने क्षेत्रदेखि दायाँबायाँ
रहेका घर ध्वस्त बनाउँदै नरेन्द्र गुरुङको घर आसपास रहेका सबै घर जलाएको छ । तिव्र
गतिमा हावा चलेको र पानीको अभावका कारण आगो नियन्त्रणमा लिन कठिनाई भएको
थियो । दमकल नभएको यो जिल्लामा आगो नियन्त्रणमा लिन डोजर लगाएर घर हटरा
भत्काईएको छ ।
आगलागीले जिल्ला विकास समितिको कार्यालयको
पूरानो भवन, उर्जा तथा वातावरण शाखाको कार्यालय तथा स्थानीय शान्ति
समितिको कार्यालय जलेका छन् । आगलागीले
हाम्रो फोटो स्टुडियोको तल्लो भागमा रहेको नेपाल पत्रकार महासंघको
कार्यालय समेत ध्वस्त भएको छ भने निलम न्यौपानेको घरमा रहेको रेडपाण्डा
नेटवर्क, हिमाली संरक्षण मञ्च तथा जनमुखी कृषि सहकारी संस्थाको कार्यालय र
प्रभु मनि ट्रान्सर्फर रहेको कार्यालय समेत ध्वस्त बनाएको छ ।
Comment